همام طلال
رسالة لكلمن يفجر ابگاعي يريد ..
چانت حجتك المحتل يجوز اقنع
وماظلت حجج طلعوا المحتلين ..
عبوة المن .. لولد ولايتك تزرع
ما اقبل بعد بالوطن اي تفجير..
وذيچ الساعة احذرك جندي اتطوع
حليب امي الرضعتة بي طعم بارود ..
على حگي امنفوتن اخذة مربع
وكت الضيج ولد الملحة معروفين ..
جيش ويهد حيل الكون من يفزع
مو آنه الملثم آنه حامي البيت ..
أنه دلة ومضيف وسالفة مرجع
أنه عشت بوجه ناصع بياضة وشوف..
ابنص ظلمة افكارك وجهي ظل يلمع
موذنبي اذا ما تعرف انت تعيش ..
عقلك بي خلل أمنت باليزرع
وأسف زرعوا براسك لعنة التفجير..
بزرعك ثمر غير الموت مايطلع
دم شارب بصغرك هيچ تهوه الموت..
ترست المگبرة انت شوكت تشبع
ابرگبة من خطية ام طفلها يطيح ..
اگبال عيونها وتشوفة يتگطع
اهي تبچي عليه والدمع يسگي الگاع ..
ثق چانت تخضّر زلم من تدمع
بعدها الغيرة بينة نهر ثالث شوف ..
من العباس اساس النهر والمنبع
أنه بجدامي راح اسحگ على الأرهاب ..
واهدم اوكارهم والماسمع يسمع
ليست هناك تعليقات:
إرسال تعليق
مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ